Air Astana бағдарламасы бойынша қарапайым акциялар мен жаһандық депозитарлық распискаларды (ЖДР) кері сатып алу аясында 2024 жылдың 19-25 қараша аралығында LSE, AIX және KASE-те 106 613 акция және 22 940 ЖДР сатып алды, олар 91 760 акцияға қатысты құқықты куәландырады, деп хабарлайды Kapital.kz бизнес ақпарат орталығының тілшісі авиакомпанияның KASE сайтындағы мәліметтеріне сілтеме жасап.
Осы кезеңде үш алаңда бағалы қағаздарды сатып алу бойынша жалпы мәміле сомасы 317 194,93 долларды құрады.
Жалпы алғанда, кері сатып алу бағдарламасы аясында 2 мамырдан 25 қарашаға дейін KASE, AIX және LSE-де авиакомпания 2 233 259 қарапайым акция мен 332 239 ЖДР (1 328 956 акцияға қатысты құқықты куәландыратын) сатып алды, бұл 6 509 687,49 долларды құрайды.
17 маусымда авиакомпанияда «KASE және AIX-те өте төмен өтімділікке байланысты, сондай-ақ бағалы қағаздар нарығындағы заңсыз әрекеттерге қарсы заңнаманы толық сақтау тұрғысынан, KASE және AIX-те кері сатып алу бағдарламасы аясында акциялар мен ЖДР сатып алу орташа күндік сауда көлемінің 50%-ынан аспауы мүмкін» деп хабарлады.
Еске салайық, Air Astana LSE-де қарапайым акциялар мен ЖДР-ды кері сатып алу бағдарламасын іске қосу ниеті туралы хабарлаған болатын. «Мақсат – компанияның қызметкерлерді ынталандыру бағдарламаларынан туындайтын міндеттемелерін орындау. Кері сатып алу бағдарламасының алғашқы бөлігінде авиакомпания 4 786 800 акцияны (акция және ЖДР түрінде) сатып алуды жоспарлап отыр. Бұл қазіргі уақытта компанияның орналастырылған акцияларының жалпы санының шамамен 1,3%-ын құрайды (ЖДР-ды қоса алғанда). Максималды сыйақы сомасы 12 миллион долларды (қосымша шығындарды қоса алғанда) құрайды», – делінген хабарламада.
2024 жылдың қаңтар-ақпанында Air Astana LSE, KASE және AIX-те IPO өткізді және шамамен 370 миллион доллар тартты. IPO-да компанияның акцияларын 1073,83 теңгеден (сол уақытта шамамен 2,4 доллар) сатып алуға болатын, жаһандық депозитарлық распискаларды (ЖДР) – 9,5 долларға. IPO нәтижесінде авиакомпанияның акционері Қазақстанның Бірыңғай жинақтаушы зейнетақы қоры (БЖЗҚ) 6,51% үлеспен болды. Сондай-ақ, авиакомпанияның капиталына Еуропа қайта құру және даму банкі (ЕБРР) 5% үлеспен кірді, бұл ЖДР-дың номиналды ұстаушысы CITIBANK, N.A.-NY арқылы жүзеге асырылды. KASE-тің 2024 жылдың 1 қазанындағы деректері бойынша «Самрук-Казына» Ұлттық әл-ауқат қорының үлесі 41%, ал британдық BAE Systems-тің үлесі 16,95% құрайды.